Forstjóri SVN segir að staðan sé grafalvarleg
Gunnþór Ingvason forstjóri Síldarvinnslunnar (SVN) segir að það sé alveg grafalvarleg staða komin upp þar sem hluti af athafnasvæði félagsins á Seyðisfirði er innan hættusvæðis. "Það sér hver maður að það er ekki hægt að vera með atvinnustarfsemi á hættusvæði eins og hér um ræðir," segir Gunnþór.Þetta kemur fram í blaðinu Austurglugginn sem kom út í dag. Þar segir m.a. að mikil umræða hefur blossað upp á Seyðisfirði að undanförnu um framtíð Síldarvinnslunnar. Framtíð hennar í bænum er óljós í augnablikinu. Málið var rætt ítarlega á síðasta fundi heimastjórnar Seyðisfjarðar og þar voru þrjár tillögur um viðbrögð af hálfu heimastjórnarinnar samþykktar.
Aðalheiður Borgþórsdóttir fulltrúi sveitarstjóra Múlaþings í heimastjórn Seyðisfjarðar segir að þau hafi átt samtal um þessi mál við Síldarvinnsluna og sveitarstjórn.
“Við munum halda áfram að finna lausn á þessu máli enda er Síldarvinnslan langstærsta fyrirtæki bæjarins og því mjög mikilvægt að hún starfi áfram í bænum," segir Aðalheiður.
Fram kemur í máli Aðalheiðar að málið sé nú í nokkurri biðstöðu þar sem ekki sé komið endanlegt hættumat fyrir svæðið og beðið er eftir því.
Sem stendur er í gildi bráðabirgðahættumat frá því í marslok. Komið hefur fram að endanlegt hættumat fyrir Seyðisfjörð sé væntanlegt um mitt sumar. Veðurstofan hafði ekki svarað fyrirspurn Austurgluggans um nánari tímasetningu áður en blaðið fór í prentun.
"Hvað ákvarðanir okkar varðar munu þær byggja á því að öryggi og líðan starfmanna sé í forgangi," segir Gunnþór. "Línan sem markar hættusvæðið liggur að hluta í gegnum frystihús okkar."
Ein tillagan á fyrrgreindum heimastjórnarfundi fjallaði um að hvetja sveitarstjórn Múlaþings til að hefja strax viðræður við stjórn Síldarvinnslunnar um framtíðarhugmyndir þeirra um starfsemi fyrirtækisins á Seyðisfirði. Og hvaða möguleikar eru í stöðunni.
Nánar er fjallað um málið í Austurglugganum.