Fljótsdalshérað: Selja eignir til að bæta stöðu bæjarsjóðs

ImageSveitarfélagið Fljótsdalshérað áætlar að selja fasteignir fyrir um 40 milljónir króna á næsta ári. Þetta er gert til að bæta stöðu bæjarsjóðs. Tekjusamdráttur leikur sveitarfélagið grátt.

 

Þetta kemur fram í svarbréfi sveitarfélagsins til Eftirlitsnefndar með fjármálum sveitarfélaga. Gert er ráð fyrir að eignir verði seldar fyrir um 40 milljónir króna þótt bókfært verð þeirra í dag nemi 20 milljónum. Þetta á að lækka skuldir sveitarfélagsins.

Í bréfinu segir að veltufé frá rekstri verði ásættanlegt strax í ár, yfir því sem nemi afborgunum langtímalána þótt sett markmið fyrir A-hluta, sem er í raun bæjarsjóður án fyrirtækja, náist ekki fyrr en árið 2012. Gert er ráð fyrir að greiða af langtímaskuldum við lánastofnanr samkvæmt samningum. Í árslok eiga þær að vera 229% af heildartekjum en verði komnar niður í 168% 2014.

Vakin er athygli á að árstekjur sveitarfélagsins hafi á undanförnum þremur árum dregist saman um 580 milljónir miðað við verðlag dagsins í dag. Þessu er mætt með hagræðingu, breyttu stjórnskipulagi og stjórnsýslu og mögulegri samþættingu skólastiga. Raunlaunakostnaður sveitarfélagsins var lækkaður um 160 milljónir á milli áranna 2009-10 og almennur rekstrarkostnaður um 65 milljónir á sama tíma.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.