Fjarðarheiði lokað eftir að bílar fóru út af
Veginum yfir Fjarðarheiði var lokað rétt fyrir klukkan tíu í morgun eftir að bílar lentu í vanda þar vegna slæmra akstursskilyrða. Óvíst er um opnun hennar í dag.
„Það er afar dimmt á heiðinni og mjög slæm akstursskilyrði“, segir Ársæll Örn Heiðberg, yfirverkstjóri hjá Vegagerðinni í Fellabæ.
Moksturstæki var á heiðinni í morgun en eftir að nokkrir bílar höfðu farið út af veginum var ákveðið að loka leiðinni til að forðast frekari vandræði. Þau hafa helst verið Egilsstaðamegin. Aðstoð er á leið til fólks sem lent hefur í erfiðleikum.
Gul viðvörun er í gildi á öllu Austurlandi vegna norðaustanhríðar. Samkvæmt veðurspám á að draga úr úrkomu eftir hádegið en á móti gæti bætt í vind.
Aðspurður svarar Ársæll að of snemmt sé að slá nokkru föstu um hvort hægt verði að opna heiðina í dag. Staðan verði metin um klukkan 14 en hætt sé við erfiðleikum vegna kófs.
Norræna er í höfn á Seyðisfirði og var farþegum hennar strax í gær ráðlagt að halda ekki á sumardekkjum á heiðina. Ferjan fer ekki þaðan aftur fyrr en klukkan 20:00 á morgun, þannig farþegar ættu að hafa nægt tækifæri til að komast yfir á morgun þegar veðrið verður gengið niður.
