Fjarðabyggð: Dregur heldur í sundur í öðrum tölum
Sjálfstæðisflokkurinn hefur aukið forskot sitt í Fjarðabyggð milli fyrstu og annarra talna. Meira vantar upp á að Fjarðalistinn nái inn sínum þriðja fulltrúa. Meirihlutinn heldur samt.Þótt tölurnar breytist breytir það ekki meginlínunum. Sjálfstæðisflokkur bætir við sig tveimur fulltrúum og Framsóknarflokkur einum. Vinstrihreyfingin – grænt framboð nær ekki fulltrúa. Miðflokkurinn, sem fékk fulltrúa fyrir fjórum árum, bauð ekki fram aftur.
Heildarkjörsókn í Fjarðabyggð var 63,6%. Á kjörskrá eru 3.683 og alls greiddu 2.344 atkvæði. Í bæjarstjórnarkosningunum 2018 var kjörsókn 64,4%
Aðrar tölur komu frá yfirkjörstjórn Fjarðabyggðar rétt eftir miðnætti í kvöld. Talin hafa verið 1959 atkvæði eða 83,6%. Auðir og ógildir seðlar eru 55.
Framsóknarflokkur: 601 atkvæði, 31,6%, 3 fulltrúar.
Sjálfstæðisflokkur: 715 atkvæði, 37,6%, 4 fulltrúar.
Fjarðalisti: 475 atkvæði, 24,9%, 2 fulltrúar.
Vinstrihreyfingin – grænt framboð: 113 atkvæði, 5,7%.
Samkvæmt upplýsingum yfirkjörstjórnar Fjarðabyggðar vantar núna 62 atkvæði upp á að Arndís Bára Pétursdóttir, þriðji fulltrúi Fjarðalista, felli Jóhönnu Sigfúsdóttur, fjórða fulltrúa Sjálfstæðisflokks en munurinn var mun minni í fyrstu tölum. Þá er Anna Margrét Arnarsdóttir, oddviti VG, orðin næst í röðinni, vantar 66 atkævði til að komast inn.
Ekki liggur enn fyrir hvenær lokatölur koma en síðustu kjörkassarnir úr Neskaupstað og frá Reyðarfirði voru ekki komnir á talningarstað á Eskifirði um miðnætti.