Fjarðabyggð ósátt við viðhaldið á veginum yfir Oddsskarð
Bæjarráð Fjarðabyggðar hefur lýst yfir óánægju sinni með viðhald Vegagerðarinnar á veginum yfir Oddsskarð sem stöðugt sígur. Honum er haldið í horfinu með malarofaníburði og til stendur að reyna að klæða kaflana í byrjun sumars.
Jarðsig hefur lengi verið vandamál á veginum yfir Oddsskarð en segja má að hann hafi aldrei komist aftur í samt lag eftir töluvert jarðskrið í nóvember 2015. Þá flæddi yfir veginn og klæðningin skemmdist.
Í bréfi sem undirritað er af bæjarstjóra Fjarðabyggðar til Vegagerðarinnar, í framhaldi af bókun bæjarráðs, segir hreint út að sveitarfélagið sé „ekki sátt við viðhald Vegagerðarinnar á Norðfjarðarvegi“ og á það hafi verið bent „nokkuð ítrekað“.
Bæjaryfirvöld geri sér grein fyrir að ekki sé hægt að ráðast í fullnægjandi viðgerð á þessum árstíma en vegurinn þurfi að vera í ásættanlegu lagi þannig ekki sé hætta á ferðum fyrir vegfarendur.
Mildur vetur góður fyrir vetrarfærð en ekki sigkaflana
Í svari Sveins Sveinssonar, svæðisstjóra Vegagerðarinnar á Austurlandi, er lýst skilningi á áhyggjum og afstöðu sveitarfélagsins. Þótt tíðarfarið í vetur hafi verið hagstætt fyrir vetrarfærð hafi það gert erfitt fyrir að halda vegyfirborðinu á efra sigsvæðinu í viðunandi ástandi en frost síðustu vetur hafi hins vegar gert það.
Vegurinn var lagfærður í haust en fljótlega eftir það hafi komið í ljós töluvert sig á efra svæðinu. Á neðra svæðinu virðist ástandið stöðugra nema að klæðning hefur látið undan í vætutíðinni.
Vegagerðin muni eftir megni halda köflunum í horfinu með malaryfirborði fram á vor en þeir verði síðan lagfærðir betur og klæddir í byrjun sumars.
