Fimmtungur Fljótsdælinga erlendir ríkisborgarar
Fimmtungur íbúa Fljótsdalshrepps er með erlent ríkisfang. Það er hæsta hlutfall á Austurlandi og með því hærra sem gerist á landinu.Þetta kemur fram í nýjum tölum Þjóðskrár Íslands sem byggja á íbúaskráningu 1. desember síðastliðinn.
Af 98 íbúum Fljótsdals eru 22 erlendir, eða 22,4%. Það er tíunda hæsta hlutfallið á landinu. Hæst er það í Mýrdalshreppi, 47,3% og 33,2% í Skaftárhreppi.
Á Austurlandi er hlutfallið næst hæst í Fjarðabyggð, 16,2%, 10,9% í Múlaþingi og 8,1% á Vopnafirði. Yfir Austurland allt er hlutfallið 13,3% sem þýðir að erlendir íbúar í fjórðungnum eru 1.441 talsins, álíka margir og íbúar Neskaupstaðar.