Eysteinn Þór ráðinn til Grindavíkur
Eysteinn Þór Kristinsson, fráfarandi skólastjóri Nesskóla í Neskaupstað, hefur verið ráðinn skólastjóri Grunnskóla Grindavíkur. Fleiri Austfirðingar hafa að undanförnu verið ráðnir í skólastjórastöður utan fjórðungs.Þetta kemur fram í tilkynningu frá Grindavíkurbæ. Þar segir að Eysteinn búi yfir víðtækri og yfirgripsmikilli kennslu- og stjórnunarreynslu. Hann hefur starfað í Nesskóla í rúm 30 ár, þar af sem skólastjóri síðustu þrjú ár.
Eysteinn er menntaður íþróttakennari frá Íþróttakennaraskóla Íslands ásamt því að hafa lokið B.Ed gráðu frá Háskóla Íslands og Diplómu í stjórnun menntastofnana frá sama skóla. Hann hefur störf í Grindavík 1. ágúst.
Um síðustu helgi rann út umsóknarfrestur um stöðu skólastjóra Nesskóla, sem og skólastjóra Stöðvarfjarðar- og Breiðdalsskóla. Austurfrétt hefur óskað eftir upplýsingum um umsækjendur frá Fjarðabyggð.
Þá var Hjördís Albertsdóttir nýverið ráðinn sem skólastjóri Reykjahlíðarskóla en hún er alin upp á Stöðvarfirði. Í tilkynningu frá Skútustaðahrepp segir að framtíðarsýn hennar á þróun skólastarfs hafi vegið þungt við mat umsókna en verið er að sameina skólann leikskólanum Yl sem Hjördís mun einnig veit forustu.
Hjördís er með B.Ed menntun í grunnskólakennarafræði og hefur jafnframt lagt stund á MLM nám í forystu og stjórnun við Háskólann á Bifröst. Hjördís hefur mikla kennslureynslu auk þess að vera varaformaður félags grunnskólakennara frá 2018.
Mynd: Grindavíkurbær