Eskfirðingur í hópi fálkaorðuhafa
Rósa Björg Jónsdóttir, bókasafns- og upplýsingafræðingur frá Eskifirði, var í hópi þeirra fjórtán einstaklinga sem forseti Íslands sæmdi heiðursmerki hinnar íslensku fálkaorðu í gær.Rósa Björg sem er fædd árið 1972 ólst upp á Eskifirði en hefur frá unglingsárum búið í Reykjavík þar sem hún starfar sem skráningastjóri hjá Landsbókasafni Íslands.
Hún fékk riddarakross fyrir sjálfboðaliðastörf í þágu Móðurmáls, samtaka um tvítyngi, en á þeirra vegum hefur hún skráð og miðlað barnabókum á öðrum tungumálum en íslensku. Rósa Björg er varaformaður samtakanna og veitir bókasafni þeirra forstöðu.
Í viðtali við RÚV í fyrra sagði hún frá því að hún væri með yfir 4000 barna- og unglingabækur á meira en 50 tungumálum í kjallaranum á heimili sínu í Vesturbæ Reykjavíkur. Bækurnar eru allar skráðar í gagnagrunn íslensku bókasafnanna, Gegni.
Rósa Björg lærði bæði hérlendis og á Ítalíu. Í ágúst í fyrra tók hún við sem konsúll Ítalíu í Reykjavík.
Fálkaorðuhafar á þjóðhátíðardaginn 2021. Rósa Björg er þriðja frá hægri. Mynd: Embætti forseta Íslands