Enn tveir í sóttkví
Enn eru tveir einstaklingar á Austurlandi í sóttkví vegna Covid-19 faraldursins. Rúmur mánuður er liðinn frá því síðast greindist smit á svæðinu.Í tilkynningu frá aðgerðastjórn almannavarnanefndar Austurlands eru íbúar brýndir til dáða, minntir á tveggja metra regluna sem og gildi handþvottar og sprittnotkunar.
Tveir eru í sóttkví en enginn í einangrun með virkt smit. Tilfelli greindist síðast á Austurlandi þann 9. apríl.
Í tilkynningunni er greint frá því að aðgerðastjórninni hafi að undanförnu borist fyrirspurnir um farþega sem koma til Seyðisfjarðar með Norrænu. Ferjan kom þangað í morgun en að jafnaði hafa komið um 20 farþegar með henni í síðustu fjórum ferðum. Þar hefur verið um að ræða ýmist verkafólk á leið í sóttkví B við komuna eða fólk búsett hér sem farið hefur í almenna sóttkví, eftir því sem Austurfrétt kemst næst.
Aðgerðastjórnin áréttar að samkvæmt gildandi fyrirmælum fari allir þeir sem komi til landsins í fjórtán daga sóttkví við komuna. Þeir tilkynna fyrir komu um dvalarstað hér á landi og halda beina leið þangað án samskipta við aðra á leið sinni. Engin smithætta á því að vera vegna þeirra.
Sóttkví í hjólhýsi, húsbílum eða slíku er óheimil. Sóttkví á hóteli er heimil með skilyrðum.
