Enn fæst lítið úr Smugunni
Makrílskipin sem nú eru við veiðar í Smugunni veiða mörg hver fremur lítið eins og undanfarna daga.
Þó kemur fyrir að stöku skip fiski sæmilega og í gær veiddi Guðrún Þorkelsdóttir SU t.a.m. 270 tonn. Skipin liggja við lögsögu Noregs því lítið er að hafa úr íslenska sjónum.
Vilhelm Þorsteinsson EA kom til hafnar í Neskaupstað rétt fyrir miðnætti á mánudaginn síðastliðinn með um 850 tonn. Búið er að vinna þann afla og fór töluvert í bræðslu.
Búist er við því að Börkur komi til Neskaupstaðar á morgun með um 1100 tonn.
Til skoðunar er að senda flugvél í Smuguna til þess að leita makríls úr lofti, og gert er ráð fyrir því að það verði gert ef veður leyfir næstu daga.