Engin ný Covid-smit
Engin ný Covid-19 smit greindust við sýnatöku á Austurlandi í fyrradag. Niðurstöður bárust loks í morgun. Stefnt er að opna grunnskólann á Breiðvík og Stöðvarfirði á ný á mánudag.Um áttatíu manns fóru í sýnatöku á Stöðvarfirði og Breiðdalsvík í fyrrakvöld eftir að fjögur smit voru staðfest hjá grunnskólabörnum þar. Vegna veðurs var ekki hægt að senda sýnin suður til greiningar í gærmorgun. Niðurstöður bárust ekki fyrr en í morgun en öll sýnin reyndust neikvæð.
Það sama er að segja um sýnatökur af Egilsstöðum þann dag.
Börn í 1. – 6. bekk skólans sem eru í sóttkví fara í seinni sýnatöku í dag. Þau losna úr sóttkví þegar niðurstaða liggur fyrir, sem verður vart fyrr en seint í kvöld eða fyrramálið. Ekki verður því skóli fyrir nemendur í þessum bekkjum á morgun. Fjarkennsla verður fyrir 7. – 10. bekk.
Leikskólinn verður með hefðbundnu sniði í fyrramálið en þeim tilmælum beint til foreldra að senda ekki börn í leikskólann sem eiga eldra systkini sem enn er í sóttkví. Á mánudaginn verður að öllu óbreyttu opið í bæði grunn- og leikskólunum.
Aðgerðastjórn almannavarna á Austurlandi áréttar mikilvægi þess að foreldrar og forráðamenn haldi börnum sínum heima sem eru með einkenni er bent geta til Covid-19 og fara í sýnatöku. Þannig hjálpumst við að við að takmarka útbreiðslu veirunnar.