Engin LungA hátíð í sumar

Listahátíðinni LungA, sem haldin hefur verði árlega á Seyðisfirði frá árinu 2000, verður ekki haldin í sumar vegna Covid-19 faraldursins. Tuttugu ára afmælisfögnuði er því frestað um ár.

Þetta kemur fram í tilkynningu sem hátíðarhaldarar sendu frá sér í gær.

Þar segir að ástæðan sé einföld, skipuleggjendur geti ekki borið ábyrgð á að stefna saman jafn mörgum og vanalega sæki hátíðina. Smit hefur ekki enn verið greint á Seyðisfirði og vilja skipuleggjendur ekki taka áhættuna á því með að stefna fjölda fólks til staðarins í nafni listarinnar.

Hátíðina átti að halda 11. – 19. júlí í sumar. Ekki er enn ljóst hvaða takmarkanir um samkomur verða þá í gildi en útlit er fyrir að þá verði enn til staðar reglur sem skylda samkomuhaldara til að tryggja að gestir geti haft minnst tvo metra á milli sín.

Segja má að LungA eigi sér tvær þungamiðjur. Annars vegar listasmiðjur og síðan mikla útitónleika síðasta kvöldið. Í tilkynningunni kemur fram að ekki sé hægt að halda listamönnum og birgjum í óvissu lengur. Þeir sem hafa keypt miða á hátíðina býðst að fá hann endurgreiddan eða færðan yfri á næsta ár.

Þá er bent á fjárhagslegar skuldbindingar. Ef aflýsa þyrfti á síðustu stundu yrði það trúlega hátíðinni endanlega á falli og nógu þungur er róðurinn fyrir. Ekki er talið heldur hægt að bjóða upp á gistingu eða listasmiðjur svo það standi undir sér á meðan tveggja metra reglan stendur.

„Eðli málsins samkvæmt er þetta gríðarlegt áfall fyrir okkur, enda mikil vinna og tilhlökkun að baki, en í ljósi aðstæðna bregðumst við þessari fordæmalausri stöðu og snúum aftur tvíefld á næsta ári,“ segir Björt Sigfinnsdóttir, framkvæmdastýra hátíðarinnar í tilkynningu.

Skipuleggjendur LungA ætla þó ekki að leggja árar alfarið í bát og boða minni viðburði í júlí fyrir Seyðfirðinga og gesti. Þá sé verið að skipuleggja opið vefgallerí auk þess sem 20 ára afmælisbók LungA og afmælisvarning verði hægt að kaupa í vefverslun hátíðarinnar.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.