Endurbætur á Norrænu ganga vel
Endurbætur á ferjunni Norrænu, sem siglir vikulega til Seyðisfjarðar, ganga vel. Enn er þó rúmur mánuður í að ferjan sigli á ný.Að lokinni síðustu ferð fyrir jól fór ferjan í Fayard slippstöðina í Munkebo í Danmörku.
Norræna, sem smíðuð var árið 2003, fær talsverða andlitslyftingu. Þilför verða endurnýjuð, bætt við 50 tveggja manna káetum og nýju kaffihúsi ásamt fleiru. Endurbæturnar kosta rúmar 200 milljónir króna.
Ferjan verður í slipp fram í byrjun mars en ráðgert er að hún hefji siglingar á ný 6. mars. Smyril-Line, útgerð hennar, sendi nýverið frá sér myndir sem sýna hvernig vinnunni vindur fram.