Ekki sjáanleg ummerki um óstöðugleika í brúnum
Úrkomulaust hefur verið á Seyðisfirði frá því um miðnætti. Hryggur við Búðará hefur færst um alls 7 sm., frá því rigningarlotan hófst í byrjun mánaðarins. Útlit er fyrir að heldur fari nú að stytta upp.Þetta má lesa út úr yfirliti Veðurstofu Íslands í dag. Þar kemur fram að um úrkoma á Seyðisfirði hafi verið um 20 mm. síðasta sólarhringinn, heldur meiri í Botnum og Vestdal en í bænum sjálfum.
Í gær var farin vettvangsferð um Botna og Þófa til að kanna aðstæður. Engin yfirboðsummerki sáust um mikinn óstöðugleika í brúnum. Þá virðist vatn heldur hafa sjatnað miðað við hvernig var á fimmtudag.
Hreyfing á hryggnum við Búðará, sem gengur orðið undir nafninu Búðarhryggur, hafa verið 7 sm. í mánuðinum. Minni hreyfingar hafa verið utan við hann en þær jukust þó heldur með úrkomunni síðustu daga.
Á Eskifirði var úrkoman ekki nema 3 mm. í gær. Mikið var í ám þar á tímabili en engin merki um óstöðugleika, svo sem óverulegar hreyfingar á aflögunarmælum.
Á báðum stöðum er grunnvatnsstaðahá þótt hún hafi heldur lækkað í dag. Óvissustig vegna skriðuhættu er því enn í gildi fyrir Austfirði og umferð í lækjar- og skriðufarvegum á Seyðisfirði ekki talin æskileg.
Spáð er rigningu seinni partinn í dag og aftur í fyrramálið, þó mun minni en á fimmtudag. Eftir það er ekki útlit fyrir teljandi úrkoma aftur fyrr en á miðvikudagsmorgun.
Vatnsyfirborð Lagarfljóts er enn hátt þótt það hafi lækkað töluvert í vikunni.