Dæmdur til að greiða 15 milljónir fyrir brot á skattalögum
Fyrrverandi framkvæmdastjóri Smiða ehf. var í vikunni dæmdur í Héraðsdómi Austurlands í þriggja mánaða skilorðsbundið fangelsi fyrir „meiri háttar brot á skattalögum.“ Honum ber að auki að greiða tæpar 15 milljónir í sekt.
Sérstakur saksóknari gaf í vor út ákæru á hendur framkvæmdastjóranum og fyrrverandi stjórnarformenn sem voru prókúruhafar Smiða ehf., verktakafyrirtækis á Reyðarfirði. Þeim var gefið að sök að hafa árin 2009 og 2010 ekki staðið skil á virðisaukaskatti og staðgreiðsluskatti af launum upp á tæpar 40 milljónir króna hvor.
Framkvæmdastjórinn játaði brot sitt greiðlega en formaðurinn neitaði og er enn ódæmt í hans hluta málsins. Eftir að málið kom fyrir dóm var hluti ákærunnar afturkallaður þannig að hlutur framkvæmdastjórans lækkaði í tuttugu milljónir.
Framkvæmdastjórinn var því dæmdur í þriggja mánaða skilorðsbundið fangelsi og til að greiða tæpar 15 milljóna sekt innan mánaðar, ella sæta sjö mánaða fangelsi.
Fyrirtæki mannanna fékk greiðslustöðvun í lok árs. Haustið 2009 var það dæmt í félagsdómi fyrir ólögmæta uppsögn trúnaðarmanns í byrjun árs. Þá var níu starfsmönnum sagt upp en sjö þeirra endurráðnir. Trúnaðarmaðurinn var annar tveggja sem ekki voru endurráðnir.
