Búið að leysa mygluvandann í Nesskóla
Búið er að leysa mygluvandamálið sem kom upp í Nesskóla í Neskaupstað í síðasta mánuði og er skólahald nú með eðlilegum hætti.Marínó Stefánsson sviðsstjóri framkvæmdasviðs hjá Fjarðabyggð segir að kennsla hafi hafist í síðustu viku í þeim hluta skólans sem myglunnar varð vart.
“Þessi vandi var bundinn við norðurhluta skólahúsnæðisins og mygla hefur ekki fundist á öðrum stöðum í skólanum,” segir Marinó.
Eins og fram kom í frétt Austurfréttar um málið þann 19. mars s.l. voru nemendur á efsta stigi í Nesskóla sendir heim eftir að myglan fannst. Var kennsla felld niður í þessum hluta skólans meðan verið var að leysa vandamálið. Jafnframt hefur komið fram í fréttum að enginn nemendanna hafi veikst vegna myglunnar.
Strax eftir að myglunnar varð vart voru verktakar fengnir til að hreinsa húsnæðið og uppræta mygluna og gekk það verk vel.