Breytt fyrirkomulag Eyrarrósarinnar
Eyrarrósin, verðlaun fyrir framúrskarandi menningarverkefni á landsbyggðinni, verður framvegis afhent á tveggja ára fresti í stað eins áður. Verðlaunaféð hækkar á sama tíma.Verðlaunin hafa verið afhent árlega frá árinu 2005 á vegum Listahátíðar í Reykjavík, Byggðastofnunar og Icelandair. Fimm austfirsk verkefni: LungA, Bræðslan, Skaftfell, Eistnaflug og List í ljósi hafa hlotið verðlaunin og enn fleiri verið tilnefnd.
Í gær var tilkynnt um breytt fyrirkomulag verðlaunanna. Helstu breytingarnar eru þær að viðurkenningin verður framvegis afhent á tveggja ára fresti í stað árlega. Verðlaunaféð verður hækkað úr 2 milljónum í 2,5 fyrir aðalverðlaunin auk þess sem þrenn hvatningarverðlaun upp á 750 þúsund krónur verða veitt til nýrri verkefna. Þá fá þau 100 þúsund króna gjafabréf frá Icelandair.
Til viðbótar þessu verður handhafa Eyrarrósarinnar boðið að standa fyrir veglegum viðburði á Listahátíð Reykjavíkur árið eftir auk þess sem stutt heimildamyndband verður gert um verðlaunahafann.
Hefð er fyrir því að afhenda verðlaunin í heimabæ handhafa Eyrarrósarinnar og verða þau afhent á Patreksfirði í ár þar sem heimildamyndahátíðin Skjaldborg vann í fyrra. Þau verða hins vegar afhent í maí í stað febrúar áður, en meðal annars þurfti að aflýsa afhendingunni á Seyðisfirði í fyrra vegna veðurs.
Opnað hefur verið fyrir umsóknir um Eyrarrósina í ár og er umsóknarfrestur til 26. apríl. Nánari upplýsingar og hlekk á umsóknareyðublað má finna á www.listahatid.is/eyrarrosin.
