Borgfirðingar byggja upp búð
Íbúar á Borgarfirði hittust síðasta laugardag til að standsetja gamla pósthúsið þar sem stefnt er að hefja verslunarrekstur á ný í lok mánaðarins. Engin verslun hefur verið á staðnum frá síðasta hausti.Opnun búðar á Borgarfirði var það verkefni sem varð efst á forgangslistanum á íbúaþingi sem haldið var til að ýta verkefninu Brothættar byggðir þar úr vör síðla vetrar en einu kjörbúðinni var lokað í byrjun september í fyrra.
Um síðustu helgi var boðað til vinnuhelgar í búðinni þar sem íbúar hittust til að þrífa, mála og standsetja húsnæðið.
„Það mættu fleiri en við bjuggumst við og það var miklu komið í verk sem gefur góð fyrirheit um framhaldið,“ segir Alda Marín Kristinsdóttir, verkefnastjóri Brothættar byggða.
Samhliða vinnunni í húsinu er safnað hlutafé fyrir nýja verslunarfélagið en áætlað er að fimm milljónir króna þurfi til að koma því í gang. Stefnt er að opnun verslunarinnar þann 30. júní.
Frá vinnudeginum í búðinni síðasta laugardag. Mynd: Eyþór Stefánsson
