Bók um Gullver: „Taktu eina, Norður-Atlantshafið er ekkert grín“

Árin 2012 og 2013 fóru tveir listamenn frá Seyðisfirði í túra með flaggskipi bæjarins, Gullveri NS-12. Videóhljóðlistaverk þeirra með upptökum úr ferðinni hefur farið víða um heim og aukaefni sem tengist því er nú komið út í bókaformi.

Upptökur Kristjáns Loðmfjörð og Konrads Korabiewski um borð í Gullveri fóru fram frá september 2012 fram í desember 2013. Auk þess að fara út með skipinu lögðust Kristján og Konrad í rannsóknavinnu og fengu meðal annars aðgang að dagbókum skipstjóra og nýttu kafla úr þeim í verk sitt.

Afrakstur vinnu þeirra, sem kallast NS-12, var svo frumsýndur á Seyðisfirði í júní 2014 í frystihúsinu með togarann við bryggjuna fyrir utan. Þegar gestir yfirgáfu sýninguna gengu þeir framhjá Gullveri með vélina malandi, líkt og hún gerði í verkinu en þessari uppröðun er í bókinni lýst sem „útvíkkuðum kvikmyndasal.“

Í verkinu les Vigdís Finnbogadóttir, fyrrverandi forseti Íslands, upp úr dagbókunum og í bókinni er að finna viðtal rithöfundarins Kristínar Ómarsdóttur við hana. Vigdís ræðir þar lífshlaup sitt, sýn á samfélagið og áhugamál.

„Hver er ekki trúaður sem þekkir sjómann? Ef eitthvað gengur afar vel þá segi ég að við séum leidd áfram. Mér finnst þægilegt að fara í kirkju stöku sinnum; staðfesting trúarinnar veitir mér öryggi,“ segir hún meðal annars.

Bókin geymir einnig frásögn rithöfundarins Daniel Canty af dvöl sinni á Seyðisfirði og ferð með Gullveri.

„Klukkan átta er landgangurinn tekinn frá, lúgunni lokað. Í brúnni bíður skipstjórinn þess að heilsa verðandi sjómanni. Þótt sjóveikin úr síðustu ferð hafi hjaðnað, fer skipstjórinn í lyfjaskápinn og afhendir honum pillubox. „Taktu eina, Norður-Atlantshafið er ekkert grín.“

Ekki mótmæla. Í öðrum heimum gilda aðrar reglur. Héðan í frá er ómögulegt að greina innra flæði lyfjanna frá ytra vaggi sjávarins,“ skrifar Canty.

Anna Friz ritar kafla um gerð listaverksins og reynslu listamannanna af því. Þeir líta ekki bara á skipið sem mikilvægt atvinnutæki sem færi bænum björg í bú, heldur líka hljóðfæri og sameiginlegan bústað áhafnarinnar sem geymi vonir hennar og væntingar.

„Allir þeir sem búa um borð [í skipinu] gefa líkama sína og drauma á vald hins stöðuga en þó ótrausta sambands milli togarans og aldanna,“ skrifar hún.

NS-12 hefur verið sýnt víða um heim, meðal annars Kanada, Póllandi og Berlín í Þýskalandi en verkið var tilnefnt til Mart verðlaunanna þar í landi árið 2014. Bókin er gefin út af Hatje Cantz forlaginu í Berlín.

Gullver NS-12. Mynd: Ómar Bogason


Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.