Börkur II verður Barði

Uppsjávarveiðiskipið Barði II hefur fengið nafnið Barði og einkennisstafina NK 120. Skip með þessu nafni hefur ekki verið í safni Síldarvinnslunnar síðustu fjögur ár.

Nafnið er sögufrægt þar sem Barði NK 120 var fyrsta skipið sem Síldarvinnslan eignaðist, síldveiðiskip smíðað í Austur-Þýskalandi árið 1964 og var í eigu fyrirtækisins til 1970.

Næsti barði í röðinni var fyrsti skuttogari Íslendinga og var gert út frá Neskaupstað á árunum 1970-1979, að því er fram kemur í samantekt á vef Síldarvinnslunnar um Barðana.

Sá þriðji var skuttogari og hinn fjórði frystitogari. Sá fimmti, skuttogari, var hjá Síldarvinnslunni frá árinu 2002-2017 eftir að hafa áður borið heitið Snæfugl og verið í eigu Skiptakletts á Reyðarfirði sem sameinaðist Síldarvinnslunni.

Nýjasti Barðinn er smíðaður í Tyrklandi árið 2012 fyrir norska útgerð. Þar hét hann Marlene S en varð Börkur þegar Síldarvinnslan keypti hann snemma árs 2014. Hann varð Börkur II í sumar þegar nýr Börkur, smíðaður sérstaklega fyrir Síldarvinnslunnar, kom til heimahafnar.

Börkur II var settur á söluskrá en var þó gerður áfram út, meðal annars leigði Samherji skipið til makrílveiða í sumar. Um tíma stóð til að selja Bjarna Ólafsson, skip dótturfélags Síldarvinnslunnar, og Börkur II yrði nýr Bjarni Ólafsson en af því varð ekki. 

Eftir að stóraukinn loðnukvóti var gefinn út í byrjun mánaðarins varð ljóst að þörf væri á sem flestum uppsjávarveiðiskipum til að geta veitt kvótann og Börkur II nefndur Barði. Áhöfn er komið á skipið sem lét úr höfn upp úr miðnætti til kolmunnaveiða.

Mynd: Síldarvinnslan


Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.