Boða þunga í viðræðum um hjúkrunarrými
Fjölgun hjúkrunarrýma er meðal þeirra atriða sem nýr meirihluti Framsóknarflokks og Fjarðalista í Fjarðabyggð ætlar að leggja áherslu á. Stofna á Geðræktarmiðstöð til að rjúfa félagslega einangrun.Þetta er meðal þess sem fram kemur í málefnasamningi flokkanna sem undirritaður var fyrir fyrsta fund nýrrar bæjarstjórnar á föstudaginn var.
Þar er boðað að heildarendurskoðun á málefnum eldra fólks verði haldið áfram í samstarfi við öldungaráð. Byggja á upp dagvöld og skoða aðkomu sveitarfélagsins að uppbyggingu húsnæðis.
Mikinn þunga á að leggja í viðræður við ríkið um hjúkrunarrými, einkum hjúkrunardeildina í Neskaupstað þar sem „aðstæður eru ekki á nokkurn hátt boðlegar.“
Málefni fjölskyldna
Talsmenn nýja meirihlutans hafa lýst því yfir að málefni fjölskyldna verði í forgangi. Þar er meðal annars vísað til aðgerðaáætlunar í fræðslu- og frístundastefnu til næstu þriggja ára. Skoða á úthlutunarlíkan skóla og auka nemendalýðræði.
Endurskoða á Sprett, verkefni milli ólíkra þjónustuarma sem styðja við börn. Koma á upp kynlausri salernis- og búningsaðstöðu í byggingum sveitarfélagsins og semja við Samtökin '78 um fræðslu og ráðgjöf við bæði starfsfólk og nemendur.
Bæta á aðgengi fatlaðra og í gegnum fjölskyldusvið að koma af stað Geðræktarmiðstöð, sem sérstaklega styðji við öryrkja og fólk utan vinnumarkaðar til að rjúfa félagslega einangrun þess.
„Við teljum okkur hafa komið flestum okkar málum á þessu sviði að. Geðræktarmiðstöðin er eitt af stóru málunum til að rjúfa félagslega einangrun sem margir glíma við. Við viljum vinna með fræðslu- og skólakerfinu þannig þar hafi allir jöfn tækiæfir,“ sagði Stefán Þór Eysteinsson, oddviti Fjarðalistans, við undirritunina um hvernig félagshyggjan birtist í málefnasamningnum.
Sköpunarmiðstöðin verði ein af menningarmiðstöðvum Austurlands
Áhersla verður á húsnæðismál, áfram veittur afsláttur af gatnagerðargjöldum, lóðir undirbúnar og beitt örvunaraðgerðum í þeim hverfum sem þörf er á. Unnið verður að uppbyggingu hagkvæms húsnæðis með opinberu félögunum Bríeti og Brák.
Standa á vörð um Verkmenntaskóla Austurlands og efla samstarf hans við grunnskóla. Uppbyggingu háskólaútibús verður haldið áfram.
Áhersla verður á úrgangsmál í ljósi nýrrar löggjafar og nýrri umhverfis- og loftslagsstefnu fylgt eftir. Suðurfjarðavegi á að skipta upp í áfanga, með áherslu á tvöföldun brúa, til að flýta framkvæmdum.
Kynna á Fjarðabyggð sem álitlegan stað fyrir kvikmyndagerð, styðja við landbúnað og fjölbreytta matvælaframleiðslu á svæðinu, fjárfesta í höfnum og vinna að klasa- og samvinnuhúsum í hverfum Fjarðabyggðar. Átak verði gert í ljósleiðaravæðingu þéttbýla í samvinnu við fjarskiptafélög.
Samþætta á söfnin í Fjarðabyggð við menningarstarfsemi. Sköpunarmiðstöðin á Stöðvarfirði verður studd áfram og stefnt á að hún verði formlega ein af menningarmiðstöðvum Austurlands.