Blóðþorri staðfestur á þriðja eldissvæðinu í Reyðarfirði
Matvælastofnun hefur staðfest að meinvirkt afbrigði ISA-veiru, sem veldur blóðþorra í laxi, hafi greinst í sýni sem tekið var í laxeldisstöð við Vattarnes í Reyðarfirði í síðustu viku. Öllum laxi í stöðinni verður slátrað.Þetta afbrigði veirunnar greindist fyrst hér við land í stöð Laxa við Gripalda í lok nóvember. Stöðin var strax einangruð og öllum fiski úr henni slátrað. Í kjölfarið var vöktun á hinum tveimur eldissvæðunum í firðinum stóraukin. Í apríl greindist veiran í eldinu við Sigmundarhús og var öllum laxi þaðan slátrað líka.
Fimm kílómetrar eru frá Gripalda að Sigmundarhúsum en þaðan tíu kílómetrar út í Vattarnes. Talið var að sú fjarlægð dygði til að verja síðustu stöðina.
Í tilkynningu Matvælastofnunar segir að í lok síðustu viku hafi verið tekin sýni úr grunsamlegum laxi af Vattarnesi. Í gær var staðfest að þar hefði fundist veiran sem veldur blóðþorra.
Hið meinvirka afbrigði ISA-veirunnar, sem veldur blóðþorra, greindist í sýni sem tekið var í laxeldisstöð við Vattarnes í Reyðarfirði í síðustu viku. Aðgerðaráætlun hefur verið virkjuð og mun öllum laxi í stöðinni verða slátrað. Veiran er skaðlaus mönnum og sjúkdómurinn hefur hvergi í heiminum greinst í villtum laxi.
Til að gæta fyllstu varúðar hafa Laxar fiskeldi, í samvinnu við Matvælastofnun, nú þegar virkjað aðgerðaráætlun með tilliti til slátrunar og tæmingu allra kvía. Þar með mun allur Reyðarfjörður tæmast af eldislaxi og fara í eldishvíld. Með þessari aðgerð skal gert hið ýtrasta til að uppræta og hreinsa fjörðinn af ofangreindu veirusmiti. Við Vattarnes eru í eldi um 1.160.000 laxar í níu sjókvíum og er megnið af fiskinum á bilinu 2-3 kg.
„ISA-veiran tilheyrir fjölskyldunni Orthomyxoviridae og býr yfir flestöllum eiginleikum inflúensaveira, sem við þekkjum hjá bæði fuglum og spendýrum. Þekkt eru tvö afbrigði ISA-veirunnar. Annað er góðkynja afbrigði sem aldrei veldur sjúkdómi eða tjóni (HPR0) og hitt er meinvirkt og veldur misalvarlegri sýkingu og afföllum (HPR-deleted).
Veiran er skaðlaus mönnum og berst ekki með fiskafurðum. Þess ber einnig að geta að klínískur sjúkdómur hefur hvergi á heimsvísu verið staðfestur í villtum laxi í sínu náttúrulega umhverfi, jafnvel þótt hin meinvirka gerð veirunnar hafi verið einangruð úr slíkum fiski,“ segir í tilkynningu Matvælastofnunar.
Forsvarsmenn Laxa vildu ekki tjá sig um stöðuna þegar Austurfrétt leitaði eftir því þar sem tíðindin væru aðeins nýkomin til þeirra. Von er á viðbrögðum frá fyrirtækinu á morgun.
