Bjarkey Olsen Gunnarsdóttir í oddvitasæti Vinstri grænna
Óli Halldórsson, oddviti Vinstri grænna í NA-kjördæmi, hefur gefið frá sér oddvitasæti listans og tekur Bjarkey Olsen Gunnarsdóttir við efsta sæti hans með þeim fyrirvara að kjördæmaráð staðfesti listans.
Óli Halldórsson færist niður í þriðja sæti en er þetta gert að ósk Óla þar sem upp hafa komið alvarleg veikindi hjá eiginkonu hans.
Kjördæmaráð VG kemur saman eftir helgi og kýs um listann en tillagan sem er lögð fram er sú að efstu sætin verða á þessa leið:
1. Bjarkey Olsen Gunnarsdóttir
2. Jódís Skúladóttir
3. Óli Halldórsson
Óli Halldórsson hlaut góða kosningu í prófkjöri VG fyrr á árinu. Í tilkynningu sem Óli sendi frá sér segir: „Ég tek því umboði sem mér var veitt í forvali VG af mikilli auðmýkt og virðingu en óska vinsamlegast eftir því að mínum aðstæðum verði sýndur skilningur. Með bjartsýni á batnandi heilsu og jafnvægi fjölskyldu minnar með tímanum mun ég vonandi hafa aðstæður til vaxandi þátttöku fyrir VG á ný.“
Þá óskar Óli Halldórsson eftir því að honum og fjölskyldunni verði sýnd sú virðing að fólk hafi ekki samband vegna þessara fregna með símtölum eða skilaboðum.