Bjargráðasjóður fær 500 milljónir króna vegna kaltjóna
Kristján Þór Júlíusson, sjávarútvegs- og landbúnaðarráðherra, hefur tryggt aukið fjármagn til Bjargráðasjóðs vegna óvenju mikilla kal- og girðingatjóna síðasta vetur. Veitt verður 500 milljónum aukalega í sjóðinn á árinu 2020.Þetta kemur fram á vefsíðu stjórnarráðsins. Þar segir að hlutverk sjóðsins er að veita einstaklingum og félögum fjárhagsaðstoð til að bæta meiriháttar beint tjón af völdum náttúruhamfara, meðal annars vegna tjóns á girðingum og vegna uppskerubrests af völdum óvenjulegra kulda, þurrka og kals.
Kaltjónið sem varð á túnum s.l. vetur var næstmest hjá bændum á Austurlandi. Samkvæmt upplýsingum frá Bjargráðasjóði sóttu 48 bændur á Austurlandi um bætur til sjóðsins. Um var að ræða tjón á alls 1.175 hekturum, að því er segir á austurfrétt.is í október s.l.
Alls sóttu 211 bændur á Norður- og Austurlandi um bætur vegna kals í túnum sínum. Flestar umsóknar voru úr Suður Þingeyjasýslu eða 63 talsins vegna tjóns á 1.789 hekturum.
Í heildina nema umsóknir um kaltjón hjá Bjargráðasjóði um 800 milljónum kr. Við það bætast svo 160 milljónir kr. vegna tjóns á girðingum en þar eru aðeins 2 umsóknir frá Austurlandi.
Fjárhagsaðstoð Bjargráðasjóðs felst í veitingu styrkja sem stjórn sjóðsins ákveður hverju sinni í samræmi við fjárhag og stöðu sjóðsins. Með aukinni fjárveitingu verður sjóðurinn betur í stakk búinn til að styðja við bændur sem lentu í tjóni vegna óveðursins í desember 2019 og almennrar vetrarhörku síðasta vetur, að því er segir á vefsíðu stjórnarráðsins.