Bíða rannsóknaraðila vegna eldsvoðans í húsnæði Vasks
Húsnæði efnalaugar Vasks auk verslunar fyrirtækisins á Egilsstöðum er gjörónýtt eftir mikinn eldsvoða síðdegis í gær. Tvær bifreiðar urðu einnig eldinum að bráð auk þess sem tjón varð á rými Landsnets sem er við hlið verslunarinnar. Formleg rannsókn á eldsupptökum hefst væntanlega síðar í dag.
Samkvæmt heimildum Austurfréttar varð elds vart strax í kjölfar sprenginga upp úr klukkan 16 í gær en þær sprengingar komu frá austurhluta hússins þar sem þvottahús var staðsett. Þvottahúsið var aðeins opið til klukkan 16 og því enginn þar inni þegar sprengingarnar urðu. Verslunin þar til hliðar var opin og þar tveir til þrír viðskiptavinir auk tveggja starfsmanna. Fólkið kom sér allt út um leið og sprenginga varð vart og engin hlaut nein meiðsl.
Slökkvistarf gekk hratt og vel fyrir sig eftir að gengið var úr skugga um að sprengihætta væri liðin hjá. Milli 15 og 20 slökkviliðsmenn börðust við eldinn fram eftir kvöldi og náðu að slökkva síðustu glæðurnar seint í gærkvöldi. Slökkvistarfi lauk á sjöunda tímanum í morgun.
Lögregla tók þá við vettvanginum. Vettvangsrannsókn veltur á því hvenær svæðið teljist vera orðið það öruggt að hægt sé að fara inn á það. Svæðið er afgirt og lokað og verður svo meðal rannsókn á brunanum stendur. Óvíst er hve langan tíma það taki. Tæknideild lögreglunnar á höfuðborgarsvæðinu og sérfræðingar frá Húsnæðis- og mannvirkjastofnun koma meðal annars að rannsókninni. Enn mátti sjá reyk liggja úr þverbita yfir versluninni á ellefta tímanum í morgun. Skýrslutökur hófust í gærkvöldi og halda áfram í dag til að lögregla geti gert sér grein fyrir atburðarásinni.
Ljóst er að gríðarlegt tjón hefur orðið. Svæðið sem þvottahús og verslun Vasks voru í eru gjörónýt. Áhersla slökkvistarfsins frá byrjun var að verja húsnæði Landsnets í norðurenda hússins. Það virðist við fyrstu sýn hafa tekist ágætlega þótt ljóst sé að einhverjar skemmdir hafi orðið á skrifstofuaðstöðu sem var næst veggnum við verslunina. Stjórnendur frá fyrirtækinu voru komnir austur í morgun til að meta aðstæður og samkvæmt upplýsingum frá starfsmönnum náðist að bjarga öllum helstu tækjum og tólum sem voru innandyra þegar eldurinn kviknaði. Reyk- og hitaskemmdir urðu nokkrar en aðallega á tölvubúnaði. Öðru var að mestu bjargað og atvikið mun ekki hafa áhrif á starfsemi Landsnets að neinu leyti.
Myndir af vettvangi í morgun. Rífa þurfti þak hússins af til að komast að eldinum og ekkert heillegt innandyra. Rannsóknaraðilar eru á leiðinni austur.
