Bæði ME og VA komust áfram í Gettu betur
Bæði Menntaskólinn á Egilsstöðum (ME) og Verkmenntaskóli Austurlands (VA) komust áfram í spurningakeppninni Gettu betur fyrir og um helgina.„Lið Menntaskólans á Egilsstöðum vann lið Framhaldsskólans í Mosfellsbæ (FMOS) í fyrstu umferð Gettu betur og er því komið áfram í 16 liða úrslit. Næsta viðureign fer fram miðvikudaginn 19. janúar í streymi á ruv.is. ME mætir þá Menntaskólanum við Hamrahlíð,“ segir á vefsíðu menntaskólans.
Þessi keppni ME og FMOS varð söguleg þar sem einn keppenda FMOS reyndist vera nemandi í Kvennaskólanum. Hafði sá einfaldlega svarað auglýsingu um að vera með í liðinu og síðan mætt í keppnina þegar hann var beðinn um það.
Fjallað er um málið á visir.is þar sem vitnað er í þennan nemenda sem segir: „Ég held að þau hafi verið í algjörum vandræðum með að finna einhvern í liðið.“ Málið er til rannsóknar innan Ríkisútvarpsins.
VA vann síðan öruggan sigur í gærkvöldi gegn Menntaskólanum að Laugarvatni í fyrstu umferð spurningakeppninnar Gettu-betur.
„Eftir hraðaspurningar var staðan 11-8 fyrir VA og í bjölluspurningunum kom hvert rétta svarið á fætur öðru og lauk keppninni með öruggum sigri, 23-8. VA fer því áfram í aðra umferð keppninnar og mun keppa við Borgarholtsskóla miðvikudaginn 19. janúar í beinni útsendingu á Rás 2. Það lið sem sigrar þá keppni kemst áfram í sjónvarpshluta keppninnar,“ segir á vefsíðunni.
Mynd: me.is. Þau sem keppa fyrir ME eru Heiðdís Jóna Grétarsdóttir, Gunnar Einarsson og Unnar Aðalsteinsson.
