Austfirsk veiðifélög mótmæla eldisáformum við Raufarhöfn
Sjö austfirsk náttúruverndarsamtök og veiðifélög eru meðal þeirra sem mótmæla áformum um fiskeldi við Raufarhöfn. Varað er við áhrifum eldisins á laxveiðiár á Norðausturhorni landsins.Á Raufarhöfn eru til skoðunar áform um 10.000 tonna eldi, sem yrði í sjó hluta úr ári. Raufarhöfn er innan friðunarsvæðis fyrir sjókvíaeldi, sem markað var árið 2004.
Í ályktun sem um 30 náttúruverndar- og veiðifélög sendu frá sér í dag er varað við að fjöldi laxveiðiáa, þar á meðal Selá, Vesturdalsá, Hofsá og Sunnudalsá í Vopnafirði og Jökulsá á Dal, séu í innan við 150 km fjarlægð frá eldinu og það geti haft áhrif á villtu stofnana þar. „Sjókvíaeldi á Raufarhöfn myndi gengisfella allar laxveiðiár á norðurlandi, Norðausturlandi og Austurlandi.“
Skaði geti ekki aðeins orðið á lífríkinu heldur afkomu tæplega 1.800 lögbýla á Norður- og Austurlandi sem fái tekjur af lax- og silungsveiðum. Því er skorað á sveitarstjórn Norðurþings að beita sér ekki fyrir breytingum á friðunarsvæðinu og matvælaráðherra að lögfesta hvar bannað sé að stunda sjókvíaeldi.
Forsvarsfólk veiðifélaga fyrrnefndra veiðiáa eru meðal þeirra sem skrifa undir yfirlýsinguna, ásamt formönnum VÁ – Félags um verndun Seyðisfjarðar og Náttúruverndarsamtaka Austurlands.
