Á-listinn býður ekki fram: Gamli kjarninn orðinn þreyttur

Á-listi áhugafólks um sveitarstjórnarmál býður ekki fram á Fljótsdalshéraði í sveitarstjórnarkosningunum í vor. Fráfarandi oddviti framboðsins segir að ekki hafi gengið að endurnýja framboðslistann.

„Fyrst og síðast er ástæðan að menn voru ekki tilbúnir að manna listann. Við höfðum fólk en kannski ekki í efstu sætin og gamli kjarninn var orðinn þreyttur,“ segir Gunnar Jónsson sem leitt hefur listann í síðustu tveimur bæjarstjórnarkosningum.

Stjórn listans sendi í morgun frá sér tilkynningu um að hann myndi ekki bjóða fram í kosningunum í vor. Í tilkynningunni er þakkað fyrir farsælt samstarf undanfarin ár og nýjum sveitarstjórnarfulltrúum óskað velfarnaðar á komandi kjörtímabili.

Í samtali við Austurfrétt sagði Gunnar að sátt og samstaða væri um niðurstöðuna innan listans þótt meiningarmunur hafi verið. Ekki hafi verið málefnaágreiningur og ánægja með störf listans í gegnum tíðina.

Ákvörðunin hafi hins vegar legið í loftinu í nokkurn tíma. „Það er látlaust verið að spyrja okkur og okkur fannst hreinlegast að þessi yfirlýsing kæmi út. Einn frá okkur var kominn á annan lista eftir að ákvörðunin var tekin.

Okkur finnst rétt að tilkynna ákveða þetta í tíma ef einhverjir vilja koma sér fyrir á öðrum listum. Það er sama hvar í flokki gott fólk er, ef það kemur fram og er tilbúið að starfa í sveitarstjórn.“

Gunnar segir að nokkuð hafi verið leitað að fólki til að manna listann, einkum seinni hluta vetrar, en þær þreifingar ekki borið árangur.

Á vefnum Kosningasaga kemur fram að Á-listinn hafi fyrst boðið fram á Héraði í kjölfar sameiningar 2004 og komið þá inn einum bæjarfulltrúa. Tveimur árum síðar fékk framboðið tvo fulltrúa kjörna og var Gunnar annar þeirra. Sá fulltrúafjöldi hefur haldist.

Listinn hefur verið í meirihluta frá 2010 og Gunnar formaður bæjarráðs þann tíma. Framboðið bætti við sig fylgi og fékk næst flest atkvæði í síðustu kosningum. Gunnar var þá kjörinn í bæjarstjórn fyrir hönd listans ásamt Sigrúnu Harðardóttur. Hún hætti á kjörtímabilinu og sæti hennar tók Þórður Mar Þorsteinsson.

Á-listinn er í meirihlutasamstarfi með Sjálfstæðisflokki og Héraðslistanum. Á laugardag verður tekin ákvörðun um framboð Héraðslistans en stjórn hans lagði til við aðalfund að ekki yrði boði fram því ekki hefðu komið fram frambjóðendur sem vildu taka sæti í bæjarstjórn.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.