63 nemendur brautskráðir af 14 námsbrautum
Samtals voru 63 nemendur brautskráðir frá Verkmenntaskóla Austurlands og Menntaskólanum á Egilsstöðum síðustu helgina í maí.
Athöfn Verkmenntaskóla Austurlands fór fram föstudaginn 24. maí í Tónlistarmiðstöð Austurlands á Eskifirði, en þar brautskráðust 35 nemendur af 11 námsbrautum. Lilja Guðný Jóhannesdóttir, skólameistari, segir það vera lýsandi fyrir hið fjölbreytta námsframboð skólans og í ár brautskráðust í fyrsta skipti stúdentar af nýsköpunar- og tæknibraut. Nánar má lesa um viðurkenningar fyrir árangur nemenda hér.
Athygli vakti að þrjár systur brautskráðust saman í gær, þær Rósa Margrét Möller Óladóttir, Halldóra Marín Svansdóttir og Rebekka Rut Svansdóttir frá Reyðarfirði. Nánar verður fjallað um þær í Austurglugganum og Austurfrétt á næstu vikum.
Útskrift Menntaskólans á Egilsstöðum fór fram laugardaginn 24. maí í Egilsstaðakirju, en þar brautskráðust 28 nemendur af þremur námsbrautum. Nánar má lesa um viðurkenningar fyrir árangur nemenda hér.
Umhverfismál í brennidepli í VA
Lilja Guðný flutti ávarp við brautskráninguna og gerði meðal annars að umtalsefni mikilvægi umhverfisfræðslu í skólum en VA hlaut Grænfána síðastliðið haust.
„Verkefni eins og skólar á grænni grein eru gífurlega mikilvæg í skólastarfi enda sjálfbærni einn af grunnþáttum menntunar á leik-, grunn- og framhaldsskólastigi. Með fræðslu og virkri þátttöku eykst skilningur á eigin vistspori, vistspori samfélaga og þjóða og með þeim hætti stuðlum við að sjálfbærri þróun og hófsemi.
Enda eru ungmenni víða um heim farin að láta til sín taka í umhverfismálum, ekki síst þegar kemur að baráttunni gegn loftslagsbreytingum. Ísland er þar ekki undanskilið en íslenskir og erlendir stúdentar hafa boðað til loftslagsverkfalla til að vekja athygli á vandanum sem við blasir og krefjast aðgerða. Þetta alþjóðlega verkfall ungmenna er innblásið af 16 ára gamalli sænskri stúlku, Gretu Thunberg, en skólaverkfall hennar til að vekja athygli á alvarlegri stöðu í loftslagsmálum hefur vakið mikla athygli,” sagði Lilja Guðný.
Annasamur vetur að baki í ME
Ári Ólason, skólameistari Menntaskólans á Egilsstöðum, greindi frá viðburðaríku ári í sinni ræðu, en meðal annars hófust framkvæmdir við heimavistarhús. Þá kom Árni inn á Fullveldishátíðina sem haldin var í skólanum í desember og ættfræðivefinn Ættir Austfirðinga sem opnaður var við sama tilefni. Þá greindi hann einnig frá ánægjulegri niðurstöðu könnunar á vegum SFR;
„Menntaskólinn er annars góður vinnustaður og starfsánægja starfsmanna er mikil. Það endurspeglast til dæmis í nýútkominni könnun SFR um stofnun ársins 2019, en þar er ME í fjórða sæti framhaldsskóla um útnefningu fyrir stofnun ársins og númer ellefu í heildina yfir 162 fyrirtæki og stofnanir landsins. Þetta er vissulega mjög ánægjulegt fyrir okkur öll að sjá en áfram skal haldið í þá átt að bæta enn frekar þá þætti sem snúa að starfsánægju og bættum samskiptum innan Menntaskólans.
Ennfremur sýndu samanburðartölur um launasetningu innan framhaldsskóla 2018 að kennarar í ME voru efstir þriðja árið í röð hvað varðaði grunnlaun. Það er sömuleiðis mjög ánægjulegt og sýnir að vel hefur tekist vel til með launasetningu hér innan skólans undanfarin ár,” sagði Árni.
