Makrílvertíðin hafin
Austfirsku skipin eru farin til veiða á makríl. Hjá Síldarvinnslunni í Neskaupstað hófst hún óvenju seint en beðið var eftir að makríllinn fitnaði þannig hann hentaði betur til manneldis.Vinnsla hófst hjá Síldarvinnslunni á laugardag. Þar hefur verið bætt við starfsmönnum til að hafa undan á vertíðinni að því er fram kemur í frétt á vef fyrirtækisins.
Makríl – og síldarvertíðin er þar fremur seint á ferðinni miðað við síðustu ár. Ástæðurnar eru tvær: annars vegar hafa menn beðið eftir betri makríl, hins vegar er síldarkvótinn minni.
Börkur og Beitir héldu til veiða seinni hluta síðustu viku. Landað var úr báðum skipunum í gær, 550 tonnum úr Beiti og 450 tonnum úr Berki sem veidd voru í Hvalbakshollinu.
Skip HB Granda héldu nokkrum dögum fyrr til veiða en þau landa meðal annars á Vopnafirði. Þar er unnið allan sólarhringinn í fiskiðjunni.
Á Fáskrúðsfirði landaði Ljósafellið síðasta bolfiski fiskveiðiársins í gær. Aflinn var 60 tonn, aðallega ufsi. Skipið á eftir að klára makrílkvótann í sumar og fer fljótlega í það.
