Dæmdur fyrir að reyna að múta lögreglumönnum til að henda fíkniefnum í fljótið
Héraðsdómur Austurlands hefur dæmt karlmann á fertugsaldri í tveggja mánaða fangelsi fyrir að reyna að múta lögreglumönnum til að henda fíkniefnum sem þeir fundu við leit á heimili hans í Lagarfljótið.Við leitina í byrjun desember í fyrra fundust 25,88 grömm af amfetamíni til sölu og talsvert af reiðufé.
Eftir að efnin komu í ljós bauð maðurinn fjórum lögreglumönnum peningagreiðslur gegn því að þeir hentu fíkniefnunum í Lagarfljót og greindu frá því að ekkert hefði komið í ljós við leitina.
Hann bauð þeim 35.000 krónur á mann en hækkaði síðan boðið í 50.000 þótt útskýrt væri fyrir honum að ekki kæmi til greina að þiggja það og að hann yrði kærður fyrir lögbrot.
Maðurinn játaði brot sitt skýlaust. Hann á talsverðan brotaferil að baki og hlaut síðast í apríl dóm fyrir brot gegn valdstjórninni, þá 30 daga fangelsi.
Í ljósi þessa dæmdi dómari hann nú í tveggja mánaða fangelsi fyrir að hafa fíkniefnin undir hönum og að reyna að múta lögregluþjónunum. Hann þarf einnig að greiða rúmar 100 þúsund krónur í sakarkostnað.
