Vopnafjörður eitt best stæða sveitarfélaga landsins: Breiðdalshreppur einna verst statt

vopnafjordur 02052014 0004 webRekstur Vopnafjarðarhrepps, Djúpavogshrepps, Fjarðabyggðar, Seyðisfjarðar og Fljótsdalshéraðs er í lagi og stendur undir skuldbindingum sveitarfélaganna. Breiðdalshreppur er á móti eitt verst stadda sveitarfélag landsins.

Þetta kemur fram í skýrslu Íslandsbanka um fjármál sveitarfélaga sem gefin var út í dag. Farið var yfir ársreikninga hjá 60 af 74 sveitarfélögum landsins sem samanlagt ná til 99% íbúa landsins.

Vopnafjarðarhreppur verður að teljast eitt best stæða sveitarfélag landsins sé horft til samstæðureksturs A og B hluta. Veltufé frá rekstri er um 20% og skuldahlutfallið um 70%.

Vopnafjörður og Djúpavogur falla í fyrsta flokk sem eru sveitarfélög með litlar skuldir sem reksturinn stendur vel undir. Um 80% af sveitarfélögunum í úrtakinu falla í þann flokk.

Fjarðabyggð, Fljótsdalshérað og Seyðisfjörður falla í næsta flokk þar sem skuldsetningin er mikil en reksturinn stendur vel undir henni. Veltufé frá rekstri er hvergi hlutfallslega hærra heldur en í Fjarðabyggð, um 25%. Á móti því koma hins vegar miklar skuldir.

Breiðdalshreppur er einn í fjórða flokki þar sem skuldir eru miklar og reksturinn stendur ekki undir þeim.

Í skýrslunni er bent á að varasamt sé að horfa eingöngu til samstæðunnar. Í B-hluta rekstursins eru þau verkefni sem ekki er ætlast til að skatttekjur standi undir, svo sem hitaveigur og hafnarsjóðir. Hömlur eru á hversu mikla sjóði má færa frá B yfir í A-hluta.

A-hlutinn eru lögbundin verkefni sveitarfélaganna sem fjármagna verður með skatttekjum. Sviðsmyndin eystra breytist aðeins ef aðeins er horft á hann.

Breiðdalsvík flyst í flokk 3 þar sem skuldsetning er lítil en reksturinn stendur þó ekki undir þeim. Djúpavogshreppur fellur einnig í þann flokk þar sem skatttekjur virðast vart standa undir lögboðnum rekstri.

Seyðisfjarðarkaupstaður flyst yfir í flokk 1 þar sem A-hlutinn er með litlar skuldir. Vopnafjörður helst þar einnig en kemur verr út vegna umtalsverðra skulda og minna veltufés.

Fljótdalshérað og Fjarðabyggð eru eftir sem áður í flokki 3. Staða Fljótsdalshéraðs er nánast óbreytt en staða Fjarðabyggðar versnar heldur því veltufjárhlutfallið lækkar um ein tíu prósentustig.

Borgarfjarðarhreppur og Fljótsdalshreppur voru ekki teknir með í könnuninni.

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.