1450 Austfirðingar boðaðir í bólusetningu
Búið er að boða 1450 einstaklinga í bólusetningu á Austurlandi í vikunni. Hratt verður gengið í að gefa örvunarskammt á svæðinu.Yfirvöld ákváðu í síðustu viku að reyna að bólusetja alla landsmenn á aldrinum 16-69 ára, sem fengið hafa fullnaðarbólusetningu, með örvunarskammti um sex mánuðum eftir bólusetningu.
Á Austurlandi var mikill atgangur í bólusetningum í maí og júní sem þýðir að fjöldi er kominn á tíma. Flestir verða bólusettir í þessari viku, 1450. „Þetta er eins og þegar best lét í sumar,“ segir Jónína Óskarsdóttir, fagstjóri hjúkrunar á heilsugæslusviði Heilbrigðisstofnunar Austurlands.
Mun rólegra verður síðan strax í næstu viku. Forgangshópar, einkum fólk 70 ára og eldra, fær örvunarskammtana fyrr eða þremur mánuðum eftir fullnaðarbólusetningu. Sá hópur hefur þegar fengið sína skammta, en bólusetning hefur verið í gangi jafnt og þétt hjá HSA í haust. Þannig var byrjað að gefa yngri hópum örvunarskammtana í síðustu viku.
Bólusett verður á Eskifirði á morgun en Egilsstöðum á miðvikudag. Stefnt er að bólusetja alla þá í vikunni sem fengu fullnaðarbólusetningu fyrir 26. maí. Vopnfirðingum verður boðið upp á bólusetningu þar 1. desember.
Jónína segir hug í starfsfólki HSA fyrir áhlaupið. „Það eru allir klárir í slaginn að takast á við þetta stóra verkefni og við vonumst eftir að fólki mæti vel.“
