Vel lukkuð START-torfæra á Egilsstöðum – Myndir og tilþrifamyndband
Á laugardag fór fram torfæra á vegum Akstursíþróttaklúbbsins START á Egilsstöðum. Keppt var í flokki sérútbúinna, sérútbúinna götubíla og götubílaflokki. Alls voru sextán bílar skráðir til leiks.Veðrið var ágætt, milt og gott og tæplega þúsund áhorfendur lögðu leið sína í Mýnesgrúsir. Útvarpsmaðurinn Andri Freyr Viðarsson lýsti því sem fram fór og þótti keppnin heppnast með miklum ágætum, en hún var liður í Íslandsmeistaramótaröð Akstursíþróttasambands Íslands.
Í flokki sérútbúinna vann Snorri Þór Árnason á Kórdrengnum yfirburðasigur. Í öðru sæti var Helgi Garðarson á Spiderman, en hann var að keppa í sinni fyrstu keppni og fékk einnig tilþrifaverðlaunin í flokki sérútbúinna. Heimamaðurinn Kristmundur Dagsson endaði í þriðja sæti.
Í flokki sérútbúinna götubíla sigraði Bjarki Reynisson á Dýrinu og Ívar Guðmundsson sigraði götubílaflokkinn á bíl sínum Kölska.
Meðfylgjandi eru myndir sem blaðamaður Austurfréttar tók á laugardag og hér að neðan er myndband frá torfærunni, sem Jakob Cecil Hafsteinsson tók. Eins og sjá má voru tilþrifin gríðarleg og nokkrar harðar veltur litu dagsins ljós.
