Haustinu fagnað með pönktónleikum - Myndir
Haustkomu var fagnað með pönktónleikum í Egilsbúð í Neskaupstað um síðustu helgi þar sem fjórar pönksveitir með austfirsku ívafi komu fram.
Fyrstur á svið var Pjetur St. Arason, einn með kassagítarinn sem fékk heldur óblíða meðferð. Pjetur er í sveitinni DDT skordýraeitur sem koma átti fram á kvöldinu. Þegar hún dró sig í hlé vegna anna trommuleikarans hélt Pjetur ótrauður áfram.
Næsta band var Vinnie Vamos sem kennt er við gítarleikarann og söngvarann sem býr á Stöðvarfirði en með honum í liði eru tveir Norðfirðingar. Sveitin spilaði áferðafalleg melódískt pönkrokk sem hljómaði vel í salnum.
Dægurlagapönkhljómsveitin Tuð var þriðja band kvöldsins. Hljómsveitarmeðlimir eru flestir af Norðurlandi en búa í Reykjavík og bassaleikarinn í Belgíu. Hann komst ekki austur en stöðu hans fyllti Jón Hafliði Sigurjónsson, tannlæknir úr Fjarðabyggð. Sviðsframkoman var lífleg og lögin snörp.
Kvöldinu lauk með Austurvígstöðvunum sem spila „gáfumannapönk.“ Sveitin kemur frá Eskifiðri og Reyðarfirði en yrkisefni hennar eru gjarnan sótt í málefni líðandi stundar. Fyrsta lagið en jafnframt það nýjasta hét „Hvað á að gera við þennan feita?“
Austurfrétt brá sér á tónleikana auk þess sem sýnt var frá þeim í þættinum Að austan í gærkvöldi.