Fermdist í kjól af ömmu sinni
„Ég skammaðist mín ekki fyrir þetta í eina sekúndu á sínum tíma, mér fannst þetta alveg geggjað,“ segir Fáskrúðsfirðingurinn Sigdís Telma Gunnarsdóttir, sem fermdist í kjól sem amma hennar keypti í Verðlistanum árið 1967.
Sigdís Telma sagði þessa skemmtilegu sögu í fermingarblaði Austurgluggans sem kom út í síðustu viku. Sigdís Telma fermdist á Fáskrúðsfirði árið 2007.
„Ég hef alltaf haft gaman af því að skoða gömul föt en amma hefur haldið upp á fötin sín, sérstaklega þau sem hún hefur saumað sjálf. Ég var einn daginn, þarna fyrir fermingu, að róta í kössunum hjá henni eins og ég var vön að gera, þegar ég fann kjólinn. Um leið og ég mátaði hann vissi ég það; ég ætlaði að fermast í þessum kjól. Ég get hins vegar ekki sagt í dag að mér finnist hann mjög fallegur og ég skil ekki alveg af hverju ég vildi endilega fermast í honum,“ segir Sigdís Telma hlæjandi og segir kjólinn vera karrýgulan, látlausan, ermalausan og beinan í sniðinu.
Sigdís Telma segir að ekkert geti útskýrt ákvörðun sína. „Ég hef alltaf verið mjög tengd ömmu og alltaf litið svakalega mikið upp til hennar og fannst gaman að vera í kjól af henni. Þetta á sér enga aðra orsök en það var alls ekki mikið um „vintage“ fataáhuga í mínum vinahóp á þessum tíma eða neitt slíkt, eða ég að ganga í slíkum fötum en hafði alltaf mikinn áhuga á að skoða hennar föt, sérstaklega af því hún gerði mikið af þeim sjálf.“
„Mér fannst þetta alveg geggjað“
Sigdís Telma segir fólkið í kringum hana ekki hafa látið sér bregða við val hennar. „Nei, í rauninni kippti enginn sér upp við þetta, ég kom bara með hann fram og sagðist ætla að fermast í þessum kjól, það eina sem ég var spurð að var hvort ég væri viss, sem ég var. Ég man allavega ekki eftir því að nokkur hafi haft orð á þessu. Í dag, þegar ég skoða myndirnar, væri ég alveg til í að hafa bara fermst í kjól eins og hinar stelpurnar en annars er þetta bara mjög skemmtileg saga.“
