Grísalappalísa, DJ flugvél og Geimskip á ferð um Austurland
Hljómsveitin Grísalappalísa og DJ Flugvél og Geimflaug eru þessa dagana á ferð um Austfirði. Fyrstu tónleikarnir verða í Miklagarði í Vopnafirði í kvöld.Grísalappalísa er með glænýja plötu í farteskinu sem ber nafnið „Rökrétt framhald" og hefur nú þegar fengið góðar viðtökur frá helstu tónlistarspekúlöntum landsins.
Hljómsveitin hefur einnig vakið athygli fyrir framúrskarandi tónlistarflutning á sviði og hlaut verðlaun sem besta tónleikasveit ársins 2013 að mati Reykjavík Grapevine.
Í tilefni verðlaunanna var Grísalappalísu boðið að stíga á stokk með átrúnaðargoði sínu Megasi en samstarf hans og sveitarinnar er langt frá því á enda!
Með sveitinni í för er Steinunn Eldflaug Harðardóttir, betur þekkt sem Dj Flugvél og Geimskip. Hún gaf út plötuna Glamúr í Geimnum í fyrra sem er uppfull af geggjuðum töktum, flottum bassa og fallegum sögum úr framandi heimi.
Dagskráin er lífleg kvöldskemmtun uppfull af hressilegu rokki og frumlegum yrkisefnum á íslenskri tungu.
Spilað verður í Miklagarði á Vopnafirði í kvöld, á Gömlu símstöðinni á Egilsstöðum annað kvöld og í Heima á Seyðisfirði á föstudagskvöld.
Tónleikarnir hefjast klukkan 21:00.
