„Við gleðjumst þar til annað kemur í ljós“
„Fyrstu viðbrögð mín eru þau að vera algerlega í skýjunum – að það hafi verið tekið mark á þessum mótmælum,“ segir Berglind Häsler, bóndi á Karlsstöðum í Berufirði við þeim fréttum að búið sé að samþykkja að veita 1200 milljónum til viðbótar til vegamála.Ríkisstjórnin samþykkti rétt í þessu að veita 1200 milljónum til viðbótar til vegamála. Jón Gunnarsson samgönguráðherra tilkynnti þetta eftir ríkisstjórnarfund í dag en þá höfðu blaðamenn verið boðaðir í ráðherrabústaðinn.
Meðal verkefna sem ráðist verður í á grundvelli þessara fjármuna verða verkefni í Berufjarðarbotni, Dettifossvegur, Kjósarskarðsvegur, Uxahryggjavegur, Skógarstrandaleið, og verkefni við Hornafjarðarfljót. Þetta kom fram á mbl.is fyrir stundu.
Halda sér á jörðinni
Berglind stóð ásamt fleirum fyrir fjölmennum mótmælum með því að loka Hringveginum í tvígang í byrjun mars. Þær fréttir má lesa hér og hér.
„Heimamenn segja okkur að halda okkur á jörðinni þrátt fyrir þessar fréttir, þar sem þetta sé ekki í fyrsta skipti sem svona einhverju sé lofað. Það verða í heildina settar auka 1200 milljónir í vegamál en við erum ekki farin að sjá hversu mikið kemur hingað, hvort það verði hægt að klára þetta dæmi eða aðeins einn kílómeter. En í stóra samhenginu er þetta algerlega frábært, ég er mikil bjartsýnismanneskja og vona það besta.“
