Vegagerð hafin í Berufirði
Héraðsverk er byrjað á gerð nýs vegar yfir Berufjörð sem heimamenn hafa lengi beðið eftir. Aukinn kraftur færist í verkið á næstu vikum þegar Héraðsverk lýkur annarri stórframkvæmd sem fyrirtækið hefur verið með.
„Við erum byrjaðir á fyllingu yfir fjörðinn að brúnni og skeringum í firðinum sunnanverðum, bæði lausum og föstum. Við erum að byrja að bora og sprengja í þessum töluðu orðum,“ sagði Viðar Hauksson, verkstjóri hjá Héraðsverki þegar Austurfrétt heyrði í honum í morgun.
Hafist var handa 8. ágúst, þriðjudaginn eftir verslunarmannahelgi. Við verkið starfa nú 10-15 manns en í þann hóp bætist á næstu vikum þegar Héraðsverk lýkur við gerð vegar yfir Morsá á Skeiðarársandi. Á hann verður lögð klæðning í þessari viku og vegurinn tengdur eftir næstu helgi.
Í haust verið unnið við fyllinguna að brúnni yfir fjörðinn og fergingu brúarstæðisins. Til þess verður notað efni sem til fellur við skeringar í sunnanverðum firðinum. Þá er þess dagana verið að leggja endanlegt mat á staðsetningu vinnubúða.
Nýi vegurinn verður alls 4,9 km, brúin 50 metrar en að auki þarf að gera nýjar heimreiðar að bæjunum Berufirði og Hvannabrekku.
Tilboð Héraðsverks og MVA á Egilsstöðum í verkið var rúmar 840 milljónir króna, 35 milljónum yfir kostnaðaráætlun. Verkinu skal að fullu lokið 1. september 2018.