Valdimar býður sig fram í þriðja sætið hjá Sjálfstæðisflokknum
Valdimar O. Hermannsson, bæjarfulltrúi í Fjarðabyggð, gefur kost á sér í 3. sæti á framboðslista Sjálfstæðisflokksins í Norðausturkjördæmi. Röðun fer fram á framboðslistann á sérstökum fundi kjördæmisráðsins fyrstu helgina í september.
Á fundinum verður kosið í efstu 6 sætin en á fundinum eiga sæti bæði aðal- og varamenn í kjördæmisráði flokksins í Norðausturkjördæmi.
Í tilkynningu segist Valdimar vilja nýta þá reynslu sem hann hafi aflað sér, meðal annars með setu í bæjarstjórn og bæjarráði í yfir 10 ár, verið formaður Sambands sveitarfélaga á Austurlandi auk annarra trúnaðarstarfa á sveitarstjórnarstiginu.
Hann hefur gegnt fjölda trúnaðarstarfa fyrir Sjálfstæðisflokkinn, verið formaður í aðildarfélagi í um 10 ár, er varaforamaður í stjórn kjördæmisráðs í Norðausturkjördæmi og situr í miðstjórn flokksins.
Hann hefur lengst af starfað við rekstrarstjórn, meðal annars hjá Heilbrigðisstofnun Austurlands, en einnig við verslunar-, innkaupa- og verkefnastjórnun og starfaði á Ítalíu í tvö ár.
Valdimar segir helstu áherslumál sín vera atvinnu- og byggðamál af öllum gerðum, heilbrigðismál, menntamál, ásamt samgöngumálum sem skipti miklu máli fyrir alla landsmenn. „Þá hef ég einnig áhuga á, að fenginni reynslu, ábyrgð og verkaskiptingu ríkisins og sveitarfélaga.“