Tónskólinn á Norðfirði í leikskólanum meðan gert er við vegna myglu
Tónskóli Norðfjarðar heldur til í nýjum leikskóla á Norðfirði meðan gert er við húsnæði hans í Nesskóla vegna myglu. Á Fáskrúðsfirði er að ljúka framkvæmdum við eldri hluta grunnskólans sem ráðist var í vegna gruns um myglu.
Hluta Nesskóla var lokað í vor eftir að upp komst um myglu þar í annað skiptið á tveimur árum og ráðist í umfangsmiklar viðgerðir.
Þóroddur Seljan, fræðslufulltrúi, segir útlit fyrir að þeim ljúki í árslok. Þar til er Tónskóli Norðfjarðar, sem áður hélt til á myglaða svæðinu, í tveimur deildum nýs leikskóla á Eyrarvöllum og tónmenntastofu Nesskóla.
Þá var í sumar skipt um hluta gólfefnis í elstu byggingu Grunnskóla Fáskrúðsfjarðar vegna gruns um myglu. Skólahald er hafið en er nemendum kennt annars staðar í húsinu á meðan. Framkvæmdum lýkur í þessari viku.
Þóroddur segir að sérfræðingar verði síðan fengnir til að meta ástand eldri hluta skólans og í framhaldi af þeirra niðurstöðum verða teknar ákvarðanir um framhaldið.