Töluvert um of hraðan akstur eystra
Lögreglan á Austurlandi kærði tæplega 60 ökumenn fyrir umferðalagabrot í síðustu viku. Flestir voru kærðir fyrir hraðakstur.
Umferðin á Austurlandi hefur aukist um 28% á milli ára og reynir lögreglan því að halda uppi eftirliti til að halda niðri hraðanum.
Oftast eru ferðamenn stöðvaðir á of mikilli ferð og flestir á Fagradal eða norðan við Egilsstaði. Algengt er að utan þéttbýlis séu menn á 120 km hraða en um 70 km innan þéttbýlismarka.
Þá komu upp 3 mál vegna fíkniefnaaksturs í síðustu viku og jafn mörg vegna ölvunarakstur.
LungA hátíðin á Seyðisfirði fór vel fram um helgina en þar kom fjöldi fólks saman á útitónleikum á laugardagskvöld.
Á Eistnaflugi helgina áður komu upp 26 fíkniefnamál. Það er svipað og verið hefur. Þar komu fram skammtar af LSD er sjaldgæft að finnist eystra. Talsverður erill var í kringum hátíðina en engin stórkostleg vandamál.
Fyrir þá helgi var ráðist í húsleit á Egilsstöðum. Hald var lagt á umtalsvert magn af fíkniefnum, einkum kannabisi, sem ætlað var til sölu.
