Þingmaður kallar eftir vilja þjóðarinnar um framhald flugvallarins í Vatnsmýrinni
Líneik Anna Sævarsdóttir, þingmaður Framsóknarflokksins í Norðausturkjördæmi, kallar eftir vinnu ólíkra hagsmuna að framtíð innanlands- og sjúkraflugs. Sendingar á milli horna skili engum árangri.
Líneik Anna tók málið upp á Alþingi fyrir helgi í kjölfar ályktunar bæjarráðs Fjarðabyggðar um mótvægisaðgerðir ríkisins þar sem svokallaðri neyðarbraut á Reykjavíkurflugvelli hefur verið lokað. Á sama tíma ráðast heimaaðilar í Fjarðabyggð í uppbyggingu Norðfjarðarflugvallar.
Líneik spurði þar út í ákvarðanir fyrri ráðherra samgöngumála varðandi land flugvallarins í Vatnsmýrinni.
„Nýjasta uppákoman þar sem borgin kaupir land af ríkinu, að því er virðist á grunni umdeilanlegra heimilda, er í hæsta máta undarleg.
Hvernig má það vera að einstakir ráðherrar geti tekið ákvarðanir og undirritað skuldbindingar sem hafa jafn afdrifaríkar afleiðingar fyrir almannaöryggi í landinu og raun ber vitni án þess að setja samtímis af stað vinnu við mótvægisaðgerðir? Það er ekki ásættanlegt að á suðvesturhorninu sé engin norðaustur-/suðvesturflugbraut.“
Líneik Anna kallaði eftir „afgerandi vilja þjóðarinnar“ um hvort flugvöllur og miðstöð innanlands- og sjúkraflugs verði áfram í Vatnsmýrinni.
Eins verði stjórnvöld að koma af stað vinnu hagsmunaaðila um lausn flugvallarmála. „Það mun aldrei leiða til lausnar að hver hrópi í sínu horni og síðan séu mál rekin fyrir dómstólum þess á milli.“
