Sjúkrabíll í fjögurra bíla árekstri
Enginn slasaðist þegar sjúkrabíll frá Slökkviliði Fjarðabyggðar lenti í fjögurra bíla árekstri í botni Reyðarfjarðar á föstudag. Blint var út af kófi og krapi og hálka var á vegum.
„Það eru áhyggjuefni að sjúkrabílar, sem eru vel búnir, lendi í svona óhöppum þannig við erum að skoða málið,“ segir Guðmundur Helgi Sigfússon, slökkviliðsstjóri í Fjarðabyggð.
Sjúkrabíllinn var að koma frá Egilsstöðum eftir að hafa farið með sjúkling í flug. Þegar hann er kominn niður úr Skriðunum undir Grænafelli lendir hann á afturhorni lítillar rútu sem var kyrrstæð á hans vegahelmingi.
Þaðan lendir hann á tveimur fólksbílum sem eru nánast kyrrstæðir á hinum vegarhelmingnum.
„Það eru í raun kyrrstæðir eða bílar á lítilli ferð báðum megin á akbrautinni. Hann sér þá ekki í tíma og reynir að komast á milli þeirra en lendir utan í þeim,“ segir Guðmundur.
Sjúkrabíllinn er óökuhæfur eftir óhappið þar sem framhjól brotnaði undan honum þegar hann lenti á seinni fólksbílnum. Sá skemmdist einnig nokkuð. Rútan og fremri fólksbíllinn skemmdust lítið.
Fljúgandi hálka virðist hafa verið á Reyðarfirði um þetta leyti en klukkutíma síðar varð bílvelta inni í þéttbýlinu. Engin slys urðu þar heldur á fólki.
