Njarðvíkurskriður í útboð síðsumars
Vegagerðin hefur staðfest að til standi að endurbæta veginn um Njarðvíkurskriður á leiðinni til Borgarfjarðar eystra. Fjármagn til verksins kemur úr sérstakri fjárveitingu til vegabóta en ráðist verður í viðhaldsframkvæmdir á vegum á nokkrum stöðum í fjórðungnum.Í fréttum Stöðvar 2 í gærkvöldi kom fram að 1640 milljónum af fjögurra milljarða aukaframlagi ríkisstjórnarinnar verði varið til nýframkvæmda, þar af fari 220 milljónir í að leggja bundið slitlag á tvo kafla á Borgarfjarðarvegi.
Sveinn Sveinsson, umdæmisstjóri Vegagerðarinnar á Austurlandi, segir öruggt að annar þessar kafla verði vegurinn um Njarðvíkurskriður. Hafa þarf hraðar hendur ef vegurinn á að komast í verk á þessu ári.
„Við erum að skoða hvernig við getum unnið þetta og komið í gang með stuttum fyrirvara, menn hespa ekkert af svona framkvæmdum í dag,“ segir Sveinn.
Undirbúningur hefur staðið í 2-3 vikur því ljóst hafi verið að peningur kæmi í skriðurnar en ekki verið staðfest hve há fjárhæðin yrði. Sveinn segir stefnt að því að verkið verði boðið út seint í sumar.
Ekki hefur verið ákveðið hver hinn kaflinn verði. Meðal annars er kannað hvort hann verði boðinn út með skriðunum.
Þá veitir ríkið um 2,4 milljörðum til viðhalds. Sveinn segir að á austursvæði nýtist það í laga bundið slitlag, malarvegi, styrkingar og aðrar endurbætur á vegum. Ekki sé endanlega ljóst hvaða viðhaldsframkvæmdum verði bætt við en það skýrist á næstu dögum.
