Eftirlit með ferðum yfir fjöllin: Ferðamenn taka því rólega á Skjöldólfsstöðum
Björgunarsveitin Jökull hafði um klukkan tvö snúið við um 80 bílum sem vanbúnir eru til vetraraksturs og ætluðu sér á Möðrudalsöræfi. Flestir bíða af sér veðrið á Skjöldólfsstöðum.
„Það er eiginlega fullt hús,“ segir Ólafía Sigmarsdóttir, staðarhaldari á Skjöldólfsstöðum en þar bíða á annað hundrað manns úr 50-60 bílum.
Vegagerðin kallaði til Björgunarsveitina í morgun sem setti upp vaktstöð við Skjöldólfsstaði. „Við höfum verið með þennan samning við Vegagerðina í tvö ár og þetta er í fyrsta skipti sem samstarfið virkar eins og það á að virka. Við náðum að stoppa alla tímanlega niðri. Þetta var glæsileg samvinna og Vegagerðin á hrós skilið,“ segir Sigmar Daði Viðarsson, formaður sveitarinnar.
Samkvæmt kortum Vegagerðarinnar er þæfingur á Möðrudalsöræfum og skafrenningur. Bílar sem teljast vanbúnir til vetraraksturs, á sumardekkjum eða einu drifi, eru stöðvaðir en öðrum leyft að halda áfram.
Til stendur að fara með bílalest í fylgd moksturstækja yfir fjöllin um klukkan þrjú en einnig er lokað við Mývatn og Vopnafjarðarheiði.
Mynd af Facebook-síðu Björgunarsveitarinnar Jökuls.