Kirkjan í Loðmundarfirði skemmd
Útihurðin á Klyppsstaðakirkju í Loðmundarfirði var brotin upp og stórskemmd í síðustu viku. Lögreglan á Austurlandi óskar eftir upplýsingum um mannaferðir á svæðinu.Komið var að kirkjunni fyrir helgi en henni hafði verið læst laugardaginn á undan. Þar með er ljóst að verknaðurinn hefur verið framinn einhvern tíman á því tímabili.
Hurðin er brotin eftir að hafa verið spyrnt upp og kirkjugólfið skítugt eftir að þeir sem á kirkjuna réðust óðu þar inn á skítugum skónum.
Hjá lögreglunni á Austurlandi fengust þær upplýsingar í morgun að málið væri í skoðun. Þeir sem veitt geta upplýsingar um mannaferðir í Loðmundarfirði fyrri hluta síðustu viku geta haft samband við lögregluna á Egilsstöðum í síma 440-0640 eða sent tölvupóst á This email address is being protected from spambots. You need JavaScript enabled to view it..
Klyppsstaðakirkja var reist árið 1891 en prestur sat á staðnum til ársins 1888. Kirkjan hefur aldrei verið afhelguð og er þar messað einu sinni á ári. Hún er friðlýst og að undanförnu hefur verið unnið að endurbótum á henni.
Gert er ráð fyrir að farið verði í Loðmundarfjörð á morgun til að lappa upp á hurðina til bráðabrigða og loka kirkjunni fyrir veturinn.