„Hlakka til að gefa til baka í mínu starfi“
„Starfið leggst ákaflega vel í mig, enda hefur verið skemmtilegt að sinna því undanfarið ár. Það er fjölbreytt og lifandi, kannski svolítið í mínum anda,“ segir Erla Björk Jónsdóttir sem skipaður hefur verið héraðsprestur Austurlandsprófastsdæmis.
Biskup Íslands hefur ákveðið að skipa Erlu Björk Jónsdóttur í embætti héraðsprests Austurlandsprófastsdæmis, en hún hefur gengt því starfi í fjarveru séra Davíðs Þórs Jónssonar, fyrst í hans fæðingarorlofi og svo eftir að hann tók við starfi sóknarprests Laugarneskirkju í haust.
Biskup skipar í embættið í samræmi við niðurstöðu kjörnefndar prófastsdæmisins. Tveir umsækjendur sóttu um embættið sem veitist frá 15. janúar næstkomandi. Erla Björk útskrifaðist með embættispróf í guðfræði frá Háskóla Íslands árið 2009. Hún hlýtur prestvígslu sína í Dómkirkjunni í Reykjavík næstkomandi sunnudag.
„Okkur var tekið opnum örmum“
Hvernig leggst starfið í hana? „Ég og dætur mínar búum að ákaflega jákvæðri reynslu af því ađ búa hér á Austurlandi. Okkur var tekið opnum örmum af samfélaginu og við höfum aðlagast nýjum aðstæðum mjög vel einmitt þess vegna. Nú hlakka ég til að gefa til baka í mínu starfi. Halda áfram að njóta þess að vera hér og hafa á stelpurnar mínar dafna og þroskast í góðu umhverfi.“