Heppinn að fara ekki lengra en á minnisvarðann
Einn meiddist lítillega þegar bifreið með fjóra innanborðs skautaði út úr beygjunni við Neðri-Staf á leiðinni til Seyðisfjarðar í gær. Bifreiðin endaði á minnisvarðanum sem þar stendur og geta farþegarnir prísað sig sæla með að hafa hafnað þar.Samkvæmt upplýsingum frá lögreglunni é Egilsstöðum rann bíllinn út af í beygju í hálku í gær, lenti síðan á enn meiri hálku á bílastæðinu og skautaði þaðan á minnisvarðann.
Fjórir voru í bílnum og slasaðist einn þeirra lítillega.
Ljóst er hins vegar að enn verr hefði getað farið enda hátt fall fram af útsýnisstaðnum niður í Skessubotna.
Minnisvarðinn var reistur árið 1983 til minningar um Þorbjörn Arnoddsson, bifreiðastjóra á Seyðisfirði. Veturinn 1952-53 hóf hann snjóbílaakstur yfir Fjarðarheiði og rauf þar með vetrareinangrun staðarins.
Þorbjörn hlaut riddarakrossinn fyrir brautryðjendastarf á sviði samgöngumála.
Minnismerkið er gert úr stuðlabergi úr Hjaltastaðaþinghá. Forsúlan táknar þann sem ryður brautina og sækir á brattann en minni súlurnar fyrir aftan þá sem á eftir fylgja. Því var valin staður þar sem þeir sem koma yfir heiðina sjá kaupstaðinn fyrst.
Mynd: Sigrún Guðjónsdóttir
