Gjaldfrjáls skóli á Borgarfirði
Hreppsnefnd Borgarfjarðarhrepps samþykkti bókun á fundi sínum í fyrradag um að fella niður gjöld á foreldra fyrir þjónustu skóla í sveitarfélaginu á næsta skólaári.Um er að ræða niðurfellingu leikskólagjalda, tónskólagjalda og gjalda fyrir skólamáltíðir. En tónskóli, leikskóli og grunnskóli eru rekin undir einum hatti á Borgarfirði. Eftir því sem næst verður komist er Borgarfjarðarhreppur fyrsta sveitarfélagið á Íslandi til að gera alla skólaþjónustu gjaldfrjálsa fyrir foreldra. Einhver sveitarfélög bjóða þó upp á gjaldfrjálsan leikskóla.
Rétt er að taka fram að þjónusta skólamötuneytis á Borgarfirði hefur ekki verið starfrækt alla daga vikunnar heldur hefur verið boðið uppá heita máltíð þrisvar í viku. Þjónusta mötuneytisins mun ekki breytast heldur einungis verða foreldrum barna á báðum skólastigum gjaldfrjáls.
Nemendum við Grunnskóla Borgarfjarðar hefur fækkað mikið undanfarin ár og segir Jón Þórðarson, sveitarstjóri, að hugmyndin um niðurfellingu gjalda á foreldra sé liður í því að gera sveitarfélagið að vænlegri búsetukosti. „Það er röksemdin á bakvið þetta, við viljum laða hingað fólk” segir Jón en leggur áherslu á að gjöldin séu felld niður í eitt ár til reynslu.
„Leikskólagjöld dekka auðvitað ekki nema brot af rekstrarkostnaði leikskóla almennt séð, ef þú ert að reka leikskóla fyrir 7 miljónir á ári þá munar kannski ekki miklu í stóru myndinni um skólagjöld uppá hálfa miljón. Máltíðirnar eru meiri nýbreytni og við sjáum til hvernig það gengur,” segir Jón að lokum.
